John Soliano a huramentá komo gezagheber nobo di Boneiru.
Durante un reunión spesial i solèm di Konseho Insular, John Soliano a huramentá komo gezaghèber nobo di Boneiru.
E huramentashon a tuma lugá riba djasabra 3 di ougùstùs 2024.
Sekretario Insular Christopher Frans a fungi komo maestro di seremonia. Grefir interino Mathilde Koetsier a lesa e dekreto di rei tokante nombramentu. Soliano a huramentá dilanti Representante di Reino suplente Jan Helmond. Despues di e huramentashon a firma e prosès ferbal ku ta forma parti di huramentashon. Helmond a bisti Soliano e kadena ofisial di gezaghèber.
Gezaghèber Soliano a duna su promé diskurso den su funshon nobo. Den e diskurso akí el a enfatisá entre otro e retonan di gobernashon, i elaborá riba bon gobernashon, empatia i importansia di kombibí ku otro. Despues di esaki e miembro di Konseho Insular Benito Dirksz komo presidente di komishon di konfiansa a hiba palabra. Dirks a finalisá bisando ku awor Soliano no ta tata di famia so, sino tata di pueblo tambe.
Promé ku e huramentashon Konseho Insular a tuma despedida di gezaghèber interino Reynolds ‘Nolly’ Oleana. Representante di tur partido den Konseho Insular a yama Oleana danki pa su trabou inkasabel i dedikashon. Na nòmber di Kolegio Ehekutivo diputado Anjelica Cicilia a despedí di Oleana. El a menshoná kon den reunion di BC, e gezaghèber interino komo digno eks dosente sa duna ‘straf’ si un hende no komportá su mes bon.
Oleana a entregá e kadena ofisial di gezaghèber na grefir pa por a pasa esaki na gezaghèber Soliano. Den su spich di despedida Oleana a atvertí polítikonan aktual i di den futuro pa nan no hasi promesa falsu.
Na fin dje enkuentro solèm na Passangrahan, gezaghèber Soliano a klousurá pa di promé biaha e reunion di Konseho Insular.